Сауалнама: Қазақстандықтардың жартысынан астамы бірыңғай уақыт белдеуіне қарсы

2024 жылдың наурыз айында Қазақстан бірыңғай уақыт белдеуіне көшкен болатын. Бұл өзгеріс қоғамда түрлі пікір тудырды. Жақында жүргізілген DEMOSCOPE зерттеуіне сәйкес, қазақстандықтардың 53,1%-ы бұл шешімді қолдамайды. Тек 22,1%-ы қолдау білдірсе, 15,5%-ы бейтарап көзқараста, ал 7,4%-ы бұл туралы мүлдем естімеген.

Әсіресе, уақыт бір сағатқа артқа жылжытылған шығыс және орталық өңірлердің тұрғындары арасында наразылық басым. Абай, Шығыс Қазақстан, Жетісу, Қарағанды және Ұлытау облыстарының тұрғындарының 74,6%-ы бірыңғай уақыт белдеуіне қарсы. Алматы қаласында бұл көрсеткіш 68,4%, Астанада 55,7% құрайды.

Оңтүстік өңірлерде (Шымкент, Алматы, Жамбыл, Қызылорда және Түркістан облыстары) қарсы пікір білдіргендер 47,8% болса, солтүстік облыстарда (Ақмола, Қостанай, Павлодар, Солтүстік Қазақстан) 45,3% құрайды. Батыс Қазақстанда (Ақтөбе, Атырау, Батыс Қазақстан, Маңғыстау облыстары) бірыңғай уақыт белдеуін қолдаушылар саны аздап басым: 31,8% қолдайды, 30,6% қарсы.

Уақыт белдеуінің өзгеруіне байланысты кейбір өңірлердің тұрғындары күннің кеш шығуы мен ерте батуына шағымдануда. Бұл мәселе бойынша петиция да ұйымдастырылған, алайда Сауда және интеграция министрлігі оны қанағаттандырудан бас тартты. Дегенмен, билік өкілдері үш жыл бойы жаңа уақыттың қазақстандықтардың денсаулығына әсерін зерттейтінін мәлімдеді.