Сарапшылар пікірі: Жасанды интеллект адамзатқа қандай қауіп төндіре алады

Массачусетс технологиялық институтының (MIT) зерттеуханасы жүргізген сауалнамаға сәйкес, жасанды интеллект саласындағы 272 сарапшы 2030 жылға дейін туындауы мүмкін 24 негізгі қауіп-қатер рейтингін жасап шықты, деп хабарлайды BBC News Русская служба. Технологияны тиісті деңгейде реттемеу мен шектеулердің жоқтығы салдарынан жаһандық апатты жағдайдың орын алу ықтималдығы 10 пайызды, ал бақылау толық жоғалған жағдайда 20 пайыздан астамды құрауы мүмкін. Сарапшылардың пайымдауынша, бұл қатарға 1 миллионнан астам адамның қаза табуы, 100 миллиард доллардан асатын экономикалық шығын немесе демократиялық нормалардың күйреуі сияқты өркениеттік салдарлар кіреді.

Зерттеу қорытындысы бойынша, ең жоғары қауіп деңгейі бақылаудан шығып, өздігінен адамзатқа зиян келтіруді үйренетін жүйелерге тиесілі. Мұндай жүйелер кибершабуылдар жасау, қару-жарақ әзірлеу, саяси үдерістерге араласу және өздігінен таралу қабілетіне ие болуы мүмкін. Екінші және үшінші орындарда жасанды интеллект арқылы жаппай жою қаруын жасау қаупі мен бұл технологиялардың шектеулі тұлғалар қолында шоғырлануы салдарынан әлеуметтік-экономикалық теңсіздіктің тереңдеуі орналасқан. Ал көпшілік талқылайтын жаппай жумыссыздық қаупі суреттелген рейтингтің төртінші сатысынан көрінді.

Халықаралық зерттеулер көрсеткендей, қоғамдағы жасанды интеллектке деген үрей жыл санап артып келеді. Stanford AI Index деректеріне сәйкес, бұл технологиядан қауіптенетін тұрғындар үлесі 52 пайызға жеткен. Алайда бұл алаңдаушылық әлі де болса заңнамалық шектеулердің енгізілуіне ықпал етпей отыр. Өйткені процесті реттеу жауапкершілігі бұл технологиядан тікелей қаржылық пайда табатын әзірлеушілер мен инвесторлардың еншісінде болып отыр.

Экономика салаларының ішінде жасанды интеллекттің кері әсеріне ең осал әрі қауіптісі – ақпараттық технологиялар, ұлттық қауіпсіздік және қаржы секторлары. Бұл салаларда дезинформация тарату, кибершабуылдар және қаржылық алаяқтық қаупі жоғары. Керісінше, қонақүй мен мейрамхана бизнесі, ауыл шаруашылығы, өңдеу өнеркәсібі және мәдениет салалары жасанды интеллекттің кері әсеріне ең аз ұшырайтын өндіріс бағыттары болып саналады.