Сара Назарбаеваның қандай дертке шалдыққаны белгілі болды

Тұңғыш Президенттің баспасөз хатшысы Айдос Үкібай БАҚ өкілдері мен азаматтардың көптеген сауалдарына жауап ретінде Сара Алпысқызы Назарбаеваның денсаулығы мен диагнозына қатысты ресми түсініктеме берді.

Ресми мәліметке сәйкес, Сара Назарбаева 2025 жылдың сәуір айынан бастап Алматы қаласындағы ҚР Президенті Іс басқармасы Медициналық орталығының Ұлттық госпиталінде ем қабылдаған. Сол кезеңде ол ауыр миокард инфарктісін өткергені белгілі болды.

Дәрігерлер келесідей күрделі диагноздарды анықтаған:

• Жүректің ишемиялық ауруы;
• Ұзақ уақытқа созылған ауыр қант диабеті аясындағы жүрек және өкпе жеткіліксіздігі;
• Үдемелі созылмалы бүйрек жеткіліксіздігі.

Ұзақ уақыт бойы Сара Алпысқызы өкпені жасанды желдету (ЖӨЖ) және «жасанды бүйрек» аппараттарына қосулы болған. Бірнеше айға созылған қарқынды терапиядан кейін оның денсаулығы біршама тұрақталды.

«Жағдайының тұрақталуына байланысты биылғы жылдың қаңтар айында ол стационардан шығарылды. Қазіргі уақытта Сара Алпысқызы Алматыдағы үй жағдайында дәрігерлердің бақылауында», – делінген Айдос Үкібай таратқан хабарламада.

Сара Назарбаева - Қазақстанның бірінші ханымы ретінде көптеген жылдар бойы «Бөбек» қайырымдылық қорын басқарып, еліміздегі мейірімділік пен рухани-адамгершілік тәрбие ісіне елеулі үлес қосқан тұлға.