Сара Назарбаева ауруханадан шығарылды

Қазақстанның тұңғыш президенті Нұрсұлтан Назарбаевтың жұбайы Сара Назарбаева биыл қаңтар айында Алматы қаласындағы Президент іс басқармасы Медициналық орталығының Ұлттық госпиталынан (бейресми атауы – Совминка) амбулаторлық емге шығарылған. Бұл туралы аталған медициналық мекеме informburo.kz редакциясының ресми сұрауына берген жауабында хабарлады.

Медициналық орталық әкімшілігінің мәліметінше, пациент стационарда ем қабылдап, қаңтар айында дәрігерлердің бақылауымен үй жағдайында емін жалғастыру үшін шығарылған. Денсаулық жағдайына қатысты өзге мәліметтер дәрігерлік құпияға жатады.

«Пациент емдеу курсынан өтті және қаңтар айында амбулаторлық емге шығарылды. Денсаулық жағдайы, диагнозы, емдеу әдістері мен нәтижелері туралы ақпарат “Халық денсаулығы және денсаулық сақтау жүйесі туралы” кодекстің 273-бабына сәйкес дәрігерлік құпия болып табылады және жария етілмейді», – делінген ресми жауапта.

Еске салайық, тұңғыш президенттің баспасөз хатшысы Айдос Үкібайдың хабарлауынша, Сара Назарбаева 2025 жылдың сәуір айында осы медициналық мекемеге жатқызылған. Сол кезеңде оның денсаулығы мен жүрген жеріне қатысты бейресми дереккөздер мен БАҚ-та түрлі, бір-біріне қайшы ақпараттар тараған болатын. Алайда клиника диагноз бен нақты жағдайды жарияламаған.

Осылайша, 84 жастағы Сара Назарбаева аталған госпитальда шамамен он айға жуық уақыт ем қабылдаған.