Сапалы білім: тең мүмкіндіктер мен инфрақұрылымдық жаңғырту

ҚР Оқу-ағарту министрлігінің кеңейтілген алқа отырысында 2025 жылдың қорытындылары мен еліміздің білім беру саласын дамытудағы стратегиялық басымдықтар қаралды. Министрлік инфрақұрылымды жаңғырту және оқыту стандарттарын жаңа деңгейге көтеру бағытындағы жүйелі реформаларды жүзеге асыруда.

2025 жыл отандық білім үшін «жеңістер жылы» аталып, халықаралық олимпиадаларда 1 720 оқушы бақ сынап, 1 006 медаль жеңіп алды. Әсіресе робототехника, химия және физика пәндерінен қазақстандық оқушылар әлемдік деңгейде көш бастап, абсолютті чемпион атанды. Мемлекет басшысының бастамасымен олимпиада жеңімпаздары мен олардың тәлімгерлеріне 100 миллион теңгеден астам сыйақы беріліп, енді халықаралық ғылыми байқаулардың жүлдегерлеріне де мемлекеттік қолдау көрсетіледі.

Мектеп инфрақұрылымын дамытуда «Келешек мектептері» ұлттық жобасы шешуші рөл атқарды. Жоба аясында 217 жаңа мектеп бой көтеріп, 460 мың оқушыға орын жасалды. STEM-зертханалар мен инновациялық кабинеттермен жабдықталған жаңа нысандар 43 үш ауысымды және 8 апаттық мектептің мәселесін шешті. Сонымен қатар, жемқорлықтан тәркіленген қаражат есебінен демографиялық өсімі жоғары өңірлерде 77 жаңа мектеп пайдалануға берілді.

Ауыл мен қала мектептері арасындағы білім алшақтығын жою – мемлекеттік саясаттың басты бағыты. 2025 жылы 245 мектеп жаңартылып, олардың көпшілігі ауылдық жерлерде орналасқан. «Келешек мектептері» жобасының 84 мектебі және күрделі жөндеуден өтетін 1 300 мектептің 820-сы ауыл балаларына арналған. Бұл қадамдар шалғай елді мекендердегі білім сапасын арттыруға, кадрлық және қауіпсіздік мәселелерін шешуге мүмкіндік береді.

2020 жылдан бері 1,1 миллион оқушыға арналған 1 242 жаңа мектеп салынды, үш ауысымды мектептер саны 4 есеге қысқарды. Мемлекет тарапынан жасалып жатқан бұл инвестициялар – елдің адами капиталын нығайту мен жарқын болашаққа жасалған маңызды қадам.