Санжар Боқаевтың қамау мерзімі тағы ұзартылды

Алматы қаласының тергеу соты белсенді Санжар Боқаевтың қамауда ұстау мерзімін 2026 жылғы 18 маусымға дейін ұзартты. Бұл туралы оның адвокаты Радмир Өтеп мәлімдеді.

Адвокаттың айтуынша, сот қорғау тарапының уәждеріне қарамастан, қамау мерзімін тағы бір айға ұзарту туралы шешім шығарған.

Еске салайық, Санжар Боқаев 18 наурызда ұсталып, 21 наурызда сот шешімімен екі айға қамауға алынған болатын.

Қазақстанның Бас прокуратурасы дерегінше, ол табысы төмен адамдарға ақша ұсынып, заңсыз әрекеттер жасауға тартты деген күдікке ілінген. Сондай-ақ оған аса ірі көлемде алаяқтық жасады, жалған ақпарат таратты және қоғамда теріс пікір қалыптастыру мақсатында бейнематериалдар жариялады деген айыптар тағылған.

Белсендінің жақтастары істі ашық қарауды талап етіп отыр.