Санжар Боқаевқа қатысты тергеу аяқталды

Қоғам белсендісі Санжар Боқаевқа қатысты сотқа дейінгі тергеу аяқталды. Бұл туралы оның адвокаты Радмир Өтеп мәлімдеді.

«Бүгін, 2026 жылғы 13 шілдеде Санжар Омарұлы Боқаевқа қатысты сотқа дейінгі тергеу аяқталды», – деп жазды адвокат.

Енді қорғаушылар мен күдікті қылмыстық іс материалдарымен танысуы керек. Бұдан кейін іс айыптау актісін бекіту үшін прокуратураға, кейін сотқа жолдануы мүмкін. Сондықтан соттың қашан басталатыны әзірге белгісіз.

Санжар Боқаев 18 наурызда Алматыда ұсталған. 19 наурызда сот оны екі айға қамаған. Кейін қамауда ұстау мерзімі бірнеше рет ұзартылды. Соңғы сот шешіміне сәйкес, ол 18 тамызға дейін тергеу изоляторында қалады.

Бас прокуратураның мәліметінше, Боқаев ағаштарды заңсыз кесуді және құрылыс нысандарындағы мүлікті ұрлауды ұйымдастырды деген күдікке ілінген. Тергеу нұсқасы бойынша, кейін осы әрекеттер түсірілген бейнежазбалар қоғамда теріс пікір қалыптастыру мақсатында таратылған. Сондай-ақ оған аса ірі мөлшердегі алаяқтыққа қатысты күдік тағылған.