«Самұрық-Қазына» Астанада 729 қызметкерін қысқартып, 5 млрд теңге үнемдемек

«Самұрық-Қазына» ұлттық әл-ауқат қоры Астанадағы әкімшілік-басқару персоналының 11 пайызын қысқартуды жоспарлап отыр. Компанияның «Интерфакс-Қазақстан» агенттігіне берген мәліметіне сүйенсек, бұл қадам арқылы 2026 жылдың өзінде 5 млрд теңге үнемдеу көзделген.

Қор өкілдері жоспарланған оңтайландыру жұмыстарына қатысты түсініктеме берді. Жалпы алғанда, компаниялар тобы бойынша 729 басқарушы маман жұмыстан босатылады. Бұл қызметкерлердің орташа жалақысы 762 мың теңгені құраған.

Осылайша, «Самұрық-Қазына» тек 2026 жылдың алғашқы үш тоқсанында жалақы қорынан 5 млрд теңгеге жуық қаражатты үнемдеуді көздеп отыр. Жұмыстан босатылған «ақ жағалыларға» еңбек заңнамасына сәйкес бір айлық орташа жалақы мөлшерінде өтемақы және ұжымдық шарттарда қарастырылған өзге де төлемдер беріледі. Бұл төлемдер оңтайландырудан келетін түпкілікті экономикалық тиімділікке әсер етуі мүмкін.

Айта кетейік, қор құрамына «Қазақтелеком», «Қазатомөнеркәсіп», «ҚазМұнайГаз», KEGOC сияқты ірі алпауыт компаниялар кіреді.

Бұған дейін «Самұрық-Қазына» басшысы Президент Қасым-Жомарт Тоқаевтың «сол жағалаудағы шенеуніктердің» санына қатысты сынынан кейін 650 адамды қысқарту туралы жоспарын жариялаған болатын. Еске сала кетейік, Мемлекет басшысы Үкіметтің кеңейтілген отырысында ұлттық компаниялар мен қор басшыларын жұмыс уақытында бос жүретін басқарушылар штатын шектен тыс көбейтіп жібергені үшін қатаң сынға алған еді.