Самоделкина жеке рекорд орнатып, Олимпиадада үздік ондыққа кірді

Қазақстан атынан өнер көрсеткен Софья Самоделкина Миланда өтіп жатқан XXV қысқы Олимпиялық ойындарында әйелдер арасындағы мәнерлеп сырғанауда үздік он спортшының қатарына кірді.

Спортшы еркін бағдарламада 138,99 ұпай жинап, жалпы есепте 207,46 ұпайға қол жеткізді. Бұл – оның спорттық жолындағы жеке рекорды.

Әйелдер бәсекесінде алтын жүлдені америкалық Алиса Лю иеленді – 226,79 балл. Екінші орынды жапониялық Каори Сакамото – 224,90 балл еншілесе, қола медаль жапониялық Ами Накаиға бұйырды – 219,16 балл.

Айта кетейік, бұған дейін Қазақстан қысқы Олимпиада ойындарында әйелдер мәнерлеп сырғанаудан тек екі спортшымен – 2018 жылы Элизабет Тұрсынбаева мен Айза Мамбековамен өкілдік еткен. Тұрсынбаева Пхёнчханда 12-орын алған еді.

Қазіргі таңда Миландағы Олимпиадада Қазақстан қоржынында бір ғана медаль бар – алтын. Оны ерлер арасындағы мәнерлеп сырғанауда Михаил Шайдоров сенсациялық түрде жеңіп алды.

Сондай-ақ Олимпиада–2026 ойындарында Қазақстан құрамасынан тағы бірнеше спортшы үздік ондыққа енді. Надежда Морозова 3000 метрлік конькимен жүгіруде алтыншы орын алды. Денис Никиша шорт-тректен 500 метрде жетінші болды. Илья Мизерных үлкен трамплиннен секіруде сегізінші орынға тұрақтады. Анастасия Городко параллель могулдан сегізінші нәтиже көрсетті. Евгений Кошкин 500 метр қашықтықта конькимен жүгіруден тоғызыншы орынды иеленді.