Салтанат Нүкенованың ісі: Байжановқа шыққан үкім қайта қаралады

Салтанат Нүкенованың өліміне қатысты іс бойынша сотталған Бақытжан Байжановқа шыққан үкім кассациялық сотта қайта қаралады. Бұл туралы кассациялық соттар департаменті Informburo.kz сұрауына берген жауабында мәлімдеді.

Қазіргі уақытта қылмыстық іс сот өндірісінде. Байжановтың қорғаушыларының шағымы бойынша Астана қаласының мамандандырылған ауданаралық қылмыстық сотынан Бақытжан Байжанов пен Қуандық Бишімбаевқа қатысты қылмыстық іс материалдары сұратылған.

Сот актілері тек Байжановқа қатысты қайта қаралады. Ал Бишімбаев пен оның адвокаттарынан кассациялық шағым түспеген.

Сот отырысы 14 мамырға белгіленген. Кассациялық сатыда істерді кемінде үш судьядан тұратын алқа қарайды.

Еске салсақ, 2024 жылдың маусым айының соңында сот үкімі заңды күшіне енген болатын. Сот Байжановты аса ауыр қылмысты алдын ала уәде бермей жасырып қалды деп танып, оны 4 жылға бас бостандығынан айырған.

2024 жылдың қыркүйегінде Байжанов үкімді қайта қарау туралы кассациялық өтініш берген, алайда кейін оны кері қайтарып алған. Адвокаты оның кассацияға қайта жүгінуге құқығы бар екенін айтқан.

2025 жылдың шілдесінде Степногорск соты амнистия қолдану туралы өтінішті қанағаттандырып, Байжановтың жаза мерзімі 8 ай 8 күнге қысқартылған. Сол кезде ол 1 жыл 11 ай жазасын өтеп қойған. Алдын ала мәлімет бойынша, ол 2026 жылдың қарашасында бостандыққа шығуы тиіс болған.