Салтанат Нүкенова ісі: Бақытжан Байжанов бостандыққа шығады

Салтанат Нүкенованың өліміне қатысты іс бойынша сотталған Бақытжан Байжанов жақын арада бостандыққа шығады. Бұл туралы оның қорғаушысы Ғазиз Ынтықбаев мәлімдеді.

Адвокаттың айтуынша, Байжановқа жаңа Конституцияның қабылдануына байланысты жарияланған рақымшылық қолданылған. Сот отырысы Степногорск қалалық сотында өтіп, сотталған адам оған бейнебайланыс арқылы қатысқан.

«Сот актісі түзеу мекемесіне түскеннен кейін оны дереу босатуға тиіс», – деді қорғаушы.

2024 жылғы маусымның соңында Бақытжан Байжанов аса ауыр қылмысты алдын ала уәде бермей жасырғаны үшін кінәлі деп танылып, төрт жылға бас бостандығынан айырылған еді.

2025 жылғы шілдеде Степногорск соты оған рақымшылық қолдану туралы өтінішті қанағаттандырып, жаза мерзімін сегіз ай сегіз күнге қысқартқан. Сол кезде Байжанов бір жыл он бір ай жазасын өтеп қойған болатын.

Бұған дейін оның 2026 жылғы қарашада бостандыққа шығатыны хабарланған еді. Енді жаңа рақымшылық негізінде жаза мерзімі қайта қаралып, оны дереу босату туралы шешім қабылданған.