Сәбиді миллион теңгеге сатпақ болған: Елімізде адам саудасына қатысты 41 қылмыс тіркелді

Қазақстанда сәуір айында өткен “Stop трафик” жедел алдын алу шарасы кезінде адам саудасына қатысты 41 қылмыс тіркелді, деп хабарлады Polisia.kz.

ІІМ мәліметінше, оның ішінде кәмелетке толмағандарға қатысты тоғыз дерек анықталған. Қызылорда облысында жаңа туған нәрестені сату сызбасы әшкереленді. Полиция 25 жастағы әйелдің бала туғанға дейін және одан кейін арнайы қоғамдық қорда тұрғанын анықтады.

Әйел баласынан бас тартпақ болған кезде қор басшысы оны кейін асырап алу үшін 50 жастағы әйелге 1 млн теңгеге сатуды ұсынған. ІІМ ұйымдасқан қылмысқа қарсы күрес департаментінің өкілі Қуандық Алпыс үш адамның да уақытша ұстау изоляторына қамалғанын айтты.

Алматыда адам саудасымен айналысқан ұйымдасқан топқа қатысты тергеу жүріп жатыр. Тергеу дерегінше, топ тұрақты мекенжайы жоқ адамдарды іздеп, оларды қылмыстық мақсатта пайдаланған. Олар бұл адамдардың несие тарихын жақсартып, кейін Алматы мен Шымкентте олардың атына қымбат көліктер рәсімдеп, сатып отырған.

Жетісу облысында 2005 және 2007 жылы туған екі тұрғынды еңбекке мәжбүрлеу дерегі тоқтатылды. Полиция мәліметінше, оларды ұрлап әкетіп, бір ай бойы тұрмыстық химия өндірісінде күш қолданып жұмыс істеуге мәжбүрлеген. Адамды пайдалану мақсатында ұрлау дерегі бойынша қылмыстық іс қозғалды. Күдіктілер уақытша ұстау изоляторына қамалды, жәбірленушілерге медициналық көмек көрсетілді.