Рыбакинаға әлемнің бірінші ракеткасы атану үшін екі жеңіс қажет

Қазақстандық теннисші Елена Рыбакина Цинциннатидегі WTA 1000 турнирінде тағы екі кездесуде жеңіске жетсе, алғаш рет әлемдік рейтингтің көшін бастай алады.

Қазір әлемнің бірінші ракеткасы Арина Соболенко Цинциннати турнирінің 1/8 финалында чехиялық Сара Бейлекке есе жіберіп, жарыстан шығып қалды. Беларусь теннисшісі WTA рейтингінде 2024 жылғы қазаннан бері, яғни 95 апта бойы бірінші орында тұр.

Ал Рыбакина турнирдегі өнерін жалғастырып жатыр. Ол ширек финалда Польшаның Ига Швёнтегімен кездеседі. Матч 21 тамызға қараған түні Қазақстан уақытымен сағат 04:00-де басталады.

Тікелей есептелетін рейтинг бойынша, Рыбакина Соболенкодан озып, әлемнің бірінші ракеткасы атану үшін Цинциннатиде кемінде финалға шығуы керек. Ол үшін қазақстандық теннисші алдымен Швёнтекті, одан кейін жартылай финалдағы қарсыласын жеңуге тиіс.

Рыбакина мен Швёнтек өткен аптада Торонто турнирінің финалында кездескен. Ол жолы қазақстандық теннисші қарсыласына есе жіберді.

Былтыр Рыбакина Цинциннатидегі WTA 1000 турнирінің жартылай финалына дейін жетіп, дәл осы Швёнтектен жеңілген.

Елена Рыбакина әлемдік WTA рейтингінде 23 аптадан бері екінші орында тұр. Цинциннатиде финалға жетсе, ол мансабында алғаш рет әлемнің бірінші ракеткасы атана алады.