Рыбакина Доха турнирінің (WTA 1000) ширек финалына өтті

Әлемнің үшінші ракеткасы, қазақстандық Елена Рыбакина Дохада (Катар) өтіп жатқан WTA-1000 турнирінің екінші айналымында Париж-2024 Олимпиадасының чемпионы, қытайлық Чжэн Циньвэньді қапы қалдырды.

Тартысты өткен кездесу 2 сағат 27 минутқа созылып, 4:6, 6:2, 7:5 есебімен отандасымыздың пайдасына аяқталды. Осылайша, Рыбакинаның биылғы «Australian Open» турнирінен басталған жеңісті сериясы 9 матчқа ұласты.

Бірінші сетте қытайлық теннисші Рыбакинаға өте ыңғайсыз ойын үлгісін таңып, оны корт бойымен көп қозғалуға мәжбүр етті. Нәтижесінде Чжэн Циньвэнь 6:4 есебімен басым түсті. Алайда, екінші кезеңде Елена ойын тізгінін қолға алып, қарқынын күшейтті (6:2). Шешуші сетте Рыбакина 5:3 есебімен алда тұрып, матчқа доп беру мүмкіндігін мүлт жібергенімен, соңғы сәтте мінез көрсетіп, екінші матчболдан жеңісті жұлып алды.

Рыбакина мен Чжэн арасындағы есеп енді қазақстандықтың пайдасына 3:1 болды.Рыбакина Катарда алғаш рет «Үлкен дулыға» турнирлерінің екі дүркін чемпионы мәртебесінде өнер көрсетуде.

Ширек финалда Елена Рыбакина Канаданың жас жұлдызы, 13-ші орындағы Виктория Мбокомен кездеседі. 19 жастағы Мбоко бұған дейін Мирра Андреева мен Вера Звонареваны жарыс жолынан шығарған болатын. Қос теннисші арасындағы жеке кездесулер есебінде Рыбакина 2:1 есебімен алда тұр.

Қазақстанның жұптық сындағы көшбасшысы Анна Данилина да сәтті өнер көрсетуде. Ол сербиялық Александра Круничпен бірге екінші айналымда Л. Фернандес (Канада) және К. Младенович (Франция) жұбын 6:2, 4:6, 10:4 есебімен жеңіп, ширек финалға жолдама алды. Айта кетейік, осы аптада Данилина әлемдік жұптық рейтингтің үздік ондығына (Top-10) қайта оралды.

Турнир туралы анықтама:

Жалпы жүлде қоры: $4 088 211.

Жеңімпазға берілетін сыйақы: Жеке ойында- $385 000, жұптық ойында - $110 000.