Руслан Берденов: Басымнан атты, бұғып қалдым

Берденов сотта жәбірленуші ретінде сөз алып, Ернар Жиенбайдың әйелін танымайтынын және онымен ешқандай жеке қарым-қатынасы болмағанын айтты. 

Әкім орынбасары Ернар Жиембаймен небәрі үш рет қана жүздескенін айтты. Оның екеуі жұмыс бабында, ал үшіншісі оқ атылған күні. Берденовтің сөзінше, алғашқы кездесуде Жиембай қаржы мен тендерге қатысты сұрақтарға жауап бере алмаған:

«Сол кезде “Мұндай жағдайда жұмыс істей алмаймыз” деп айттым. Ол “Керек болса, жұмыстан кетемін” деді. Мен қарсы болмадым», – деді Берденов.

Ал екінші кездесуде Жиембай кабинетіне өзі сұранып кіріп, уақытша жұмысын жалғастырып, кейін кетуге рұқсат сұраған. «Ол қолымды алып, “Сіз менің кумирімсіз” деді. Ешқандай дау болған жоқ», – деп түсіндірді жәбірленуші.

Сонымен қатар, Берденов жиналысқа Жиембайдың джинсы мен ақ футболкамен келгенін айтып, оған ескерту жасағанын растады.

Ол өз сөздерінің барлығын шындық детектор мен полиграф арқылы дәлелдеуге дайын екенін жеткізді.

Берденов сотта қастандықтың қалай жасалғанын баяндап берді. Оның айтуынша “Алғашқы оқ тура басыма бағытталды. Бұғып үлгердім. Артымнан төрт рет оқ атылды. Жерге құладым. Қасыма келіп, тағы да мылтығын оқтап жатты”,- деді ол. Сол кезде Жиембай қасына келіп, мылтығын қайта оқтап жатқан. Қансырап жатқан Берденов орнынан тұрмаса, өлетінін түсінген. Бір қолы істемей қалғанына қарамастан, ол орнынан тұрып, Жиембайдан алыстаған. Сол сәтте қарудың жерге құлағанын естіген. Айыпталушы қашуға дайындалғанда, жүргізушісі Мейрамбек тосқауыл болып, көлікпен соққан. Соған қарамастан Жиембай қашып кеткен, ал Берденов сол кезде құлап қалған.

Берденовтың сөзінше, оқиға орнында болғандардың бірі медбике болған екен, оған алғашқы көмек көрсеткен. Ол «ұйықтамаңыз, көзіңізді жұмбаңыз» деп демеп отырған. Сол сәтте Берденов оң өкпесінің істемей қалғанын сезіп, ауа жетпей, аузынан қанның дәмі келгенде өмірінің соңғы сәті жеткендей ойлаған. Кейінгі ота кезінде өкпесінің 20 пайызы алынып, бауыры шашылып қайта жиналғанын да айтты.

Сотта Ернар Жиембай түрмеден шыққан соң кешірім сұрайтынын айтты.