Родри не үшін "Алтын доп" иегері атанды?

Испания құрамасының футболшысы және ағылшындық «Манчестер Сити» клубының жартылай қорғаушысы Родри «Алтын доп» иегері атанды.

28 жастағы Родри (толық аты – Родриго Эрнандес) 2024 жылғы футболдан Еуропа чемпионатының үздік ойыншысы деп танылды. Бұл турнирде Испания құрамасы жеңімпаз атанды. Сонымен қатар ол «Манчестер Сити» сапында Англия чемпионатын да жеңіп алды.

Родри мадридтік «Реал» және Бразилия құрамасының шабуылшысы Винисиусты басып озды.

«Бұл мен үшін, отбасым үшін және елім үшін ерекше күн. Бүгінгі жеңіс мен үшін ғана емес, испан футболы үшін. Бұл сыйлықты алмаған, бірақ лайық болған көптеген ойыншыларға, соның ішінде Андрес Иньеста, Хави Эрнандес, Икер Касильяс, Серхио Бускетс және тағы басқаларға арналған», – деді қыркүйек айында алған жарақаты салдарынан сахнаға балдақпен шыққан Родри.

Үшінші орынды «Реал» жартылай қорғаушысы Джуд Беллингем иеленді, бұл 2005 жылы Фрэнк Лэмпард екінші орын алғаннан бері ағылшын ойыншылары арасындағы ең жақсы нәтиже болды.

Сондай-ақ «Реал» 2023/2024 маусымының үздік клубы деп танылып, оның бапкері Карло Анчелотти «Жылдың үздік бапкері» атанды. Дегенмен мадридтік клубтың өкілдері Париждегі марапаттау рәсіміне қатысқан жоқ. «Реал» Винисиуске «Алтын доп» берілмейтіні туралы хабардан кейін рәсімді бойкоттауды ұйғарған.