Рим мен Софияның құрметіне Астананың екі көшесіне еуропалық атау беріледі

Астана қалалық мәслихатының кезектен тыс сессиясында елорданың екі көшесіне Болғария мен Италия мемлекеттерімен өзара мәдени іс-қимыл мен сыйластықтың белгісі ретінде жаңа атаулар беру туралы бастама қолдау тапты. Бұл туралы Тілдерді дамыту және архив ісі басқармасы басшысының орынбасары Досжан Исабек мәлімдеді.

Ресми мәліметке сәйкес, Нұра ауданында орналасқан, бұған дейінгі жобалық атауы Е-524 көшесіне Болғария Республикасының бас қаласы - София есімі беріледі. Бұл шешім екіжақты халықаралық құрмет аясында қабылданып отыр. Бұған дейін Болғария астанасында ұзындығы 1 шақырымнан асатын көшелердің біріне «Астана» атауы берілген болатын. Елордадағы жаңа София көшесінің ұзындығы 535 метрді құрайды және оның бойында Hilton қонақүйі, Ұлттық татуласу музейі сияқты маңызды нысандар орналасқан.

Сонымен қатар мәслихат депутаттары «Астана Арена» стадионы мен «Алау» мұз айдыны арасындағы атаусыз көшеге әйгілі венециялық саяхатшы, зерттеуші әрі жазушы Марко Полоның есімін беруді мақұлдады. Тұран даңғылынан басталып, Қабанбай батыр даңғылына дейін созылатын бұл көшеге еуратлантикалық тарихи тұлғаның есімін беру бастамасы алғаш рет 2025 жылдың қыркүйегінде көтерілген болатын. Басқарма өкілі бұл қадамның да өзара мәдени байланысқа негізделгенін, атап айтқанда, 2025 жылы Рим қаласындағы әйгілі «Вилла Боргезе» саябағында қазақтың ұлы ақыны Абай Құнанбайұлына ескерткіш ашылғанын еске салды.

Ұсынылған жаңа атаулар қалалық ономастика комиссиясының мақұлдауынан өтіп, ресми құжаттамаларда, навигациялық жүйелерде және мобильді қосымшаларда қолданысқа енгізілу үшін тиісті рәсімдеуден өтпек.