«Ресейліктерге бүйрегі бұрды»: Халықаралық конькишілер одағы қазақстандық төрешіге қатысты мәлімдеме жасады

Италияда өткен Қысқы Олимпиада ойындарында қазақстандық мәнерлеп сырғанау төрешісі Надежда Парецкаяға қатысты айтылған бейтарапсыздық айыптарына байланысты Халықаралық конькишілер одағы (ISU) ресми мәлімдеме жасады. Ресми хат Қазақстанның мәнерлеп сырғанау федерациясына жолданған.

Мәлімдемеде ISU Парецкаяның ерлер мен әйелдер арасындағы жекелей сырғанаудағы төрешілік жұмысын жоғары бағалайтынын атап өткен.

– Олимпиада ойындарындағы төрешілігіңіз ISU ережелеріне толық сәйкес болды, бейтарап әрі ұлттық деңгейдегі ешқандай көзқарасқа жол бермеді. Бұл – мәнерлеп сырғанаудың тұтастығын сақтау және оның әділ әрі беделді спорт түрі болып қалуы үшін қойылатын басты талап, – деп жазды мәнерлеп сырғанаудағы адалдықты қамтамасыз ету бөлімінің басшысы Ребекка Кэрнс.

Сонымен қатар ISU Қазақстандағы бұқаралық ақпарат құралдары немесе қоғам тарапынан Парецкаяға қатысты қудалау әрекеттерін қатаң айыптайтынын мәлімдеді.

Қазақстанның мәнерлеп сырғанау федерациясы өкілдерінің айтуынша, Олимпиада ойындарының төрешілер алқасында қазақстандық маманның болуы – ұлттық федерация үшін үлкен мәртебе. Бұл елімізде халықаралық деңгейдегі сарапшылар бар екенін және оларға медаль тағдырын сеніп тапсыруға болатынын көрсетеді.

Бұған дейін бірқатар БАҚ-та қазақстандық төрешіге қатысты бейтарапсыздық туралы айыптаулар жарияланған еді. Онда ол ресейлік спортшыларға жоғары баға қойып, алтын медаль алған америкалық Алиса Лью мен жапониялық мәнерлеп сырғанаушыларға төмен ұпай бергені айтылған.

Қазақстан Ұлттық олимпиада комитеті төрешілерді тағайындау олардың құзыретіне кірмейтінін түсіндірді. Судьяларды іріктеу кезінде ISU халықаралық санаттың болуы, расталған біліктілік және ірі халықаралық жарыстардағы тәжірибеге сүйенеді.