Ресейліктер АҚШ-қа туристік виза алу үшін Қазақстанға келуі керек

АҚШ Мемлекеттік департаменті иммиграциялық емес визаларды беру тәртібіне өзгеріс енгізді. Енді Ресей азаматтары туристік, іскерлік және басқа да визаларға өтініш беру үшін Астанадағы АҚШ елшілігіне немесе Варшавадағы консулдыққа жүгінуі тиіс.

6 қыркүйекте жарияланған құжатқа сәйкес, АҚШ визалық операция жүргізбейтін елдердің азаматтары арнайы тағайындалған локацияларда ғана құжат тапсыра алады. Ресей үшін мұндай орталықтар – Астана мен Варшава.

Ведомствоның мәліметінше, бұған дейін сұхбатқа жазылғандардың брондары сақталады, күшін жоймайды. Алайда күту мерзімі өтініш берілген елге байланысты өзгеруі мүмкін.

Жаңа ережелер дипломатиялық және ресми визаларға, сондай-ақ гуманитарлық немесе медициналық төтенше жағдайларға қатысты қолданылмайды.

Бұған дейін ресейліктер АҚШ визасына түрлі елдерде, соның ішінде Тбилиси, Ереван, Алматы және Еуропа астаналарында өтініш бере алатын. Енді бұл мүмкіндік шектелді.

Ал шетелде тұрақты тұратын ресейліктер құжаттарын басқа елдерде тапсыра алады, бірақ өздерінің тұрғылықты жерін дәлелдеуі тиіс. Өзгерістер туристік (B-2), іскерлік (B-1), студенттік, алмасу бағдарламаларына арналған (J), сондай-ақ журналистік (I) сияқты ондаған санаттағы визаларға қатысты.