Ресейлік комментатор қазақстандық балаларды балағаттады

Омбы қаласында өткен балалар мен жасөспірімдер арасындағы хоккей турнирі кезінде ресейлік спорт комментаторы Максим Гречанин қазақстандық командаға қатысты қорлайтын сөздер айтты. Оқиға «Сібір» мен «Астана» командалары арасындағы матч басталар алдында тіркелгенін «Ақ Жайық» басылымы хабарлады.

Басылым мәліметінше, тікелей эфир барысында комментатор қазақстандық жас спортшыларды балағаттаған. Атап айтқанда, комментатор жас спортшыларды «пид..ас», «чебурод» деп атаған. Бұл сөздер трансляцияны тамашалаған көрермендерге естілген.

Оқиға қоғамда кең резонанс тудырды. Жас хоккейшілердің ата-аналары ресми шағым түсірген. БАҚ деректеріне сәйкес, комментаторға қатысты ұлтаралық және діни араздықты қоздыру бабымен тексеріс басталуы мүмкін. Сондай-ақ оның жұмыс істейтін телеарнамен одан әрі ынтымақтастығы да күмән тудырып отыр.

Кейінірек Максим Гречанин көпшілік алдында кешірім сұрап, микрофонның өшірулі екеніне сенімді болғанын айтты.

«Матч басталар алдында эфирге кеткен сөздерім мүлде айтылмауы керек еді. Бұл “Астана” ХК-ға да, басқа кез келген командаға да қатысты болмауы тиіс. Менің әрекетім дөрекі әрі этикаға жат болды. Бұл екі ел халқы арасында ұлтаралық араздық тудыру ниетін көздеген жоқ», – деді ол.

Айта кетейік, Қазақстан заңнамасында мұндай сипаттағы мәлімдемелер ауыр жауапкершілікке әкелуі мүмкін. Ұлтаралық немесе діни араздықты қоздырғаны үшін жеті жылға дейін бас бостандығынан айыру жазасы қарастырылған.