Ресей Қазақстаннан ішкі әуе қатынастарын қамтамасыз етуге көмек сұрады

Бұл туралы Ресейдің көлік министрі Роман Старовойт мәлімдеді, деп хабарлады "Интерфакс". Мәліметке сәйкес, Ресей билігі Қазақстан мен басқа да "дос" елдерге жүгініп, ішкі жолаушылар әуе тасымалын ұйымдастыруға қолдау көрсетуді сұраған. 

Бұл сұраныс каботаждық рейстерге қатысты, яғни шетелдік әуе компанияларына басқа елдің аумағында ішкі рейстер орындауға мүмкіндік беретін жүйе. Бұған дейін мұндай құқық тек ресейлік әуе компанияларына ғана берілген еді.

Ресей билігі Қазақстанмен осы мәселе бойынша келіссөздер жүргізіп жатыр. Қазақстанда биыл авиациялық қозғалыс көрсеткіші 35%-ға артқан.

Дегенмен, азаматтық авиация саласының сарапшысы Федор Борисов каботаждың ел экономикасына зиян тигізуі мүмкін екенін айтты. Ол бұл шешімді ең тиімсіз тәсіл деп санайды, өйткені шетелдік әуе компаниялардың қатысуы ұлттық экономиканы әлсіретеді.

Ресейде ұшақ паркі 2022 жылғы 850 ұшақтан 2023 жылы 736-ға дейін қысқарған. Ал 2026 жылға дейін ұшақтар саны екі есе азаюы мүмкін. Елде әуе кемелерін өз өндірісі арқылы алмастыру жоспарланғанымен, өндіріс көлемі айтарлықтай азайған.

Санкцияларға байланысты Ресей азаматтық авиациясын қолдауға 12 миллиард доллардан астам қаржы бөлген.