Ресей Қазақстанмен шекарадағы кедендік бақылауды күшейтпек

Ресей Қазақстан және Беларусьпен арадағы шекарада тұрақты әрі қатаң кедендік бақылау енгізуді жоспарлап отыр. Бұл туралы Ресей премьер-министрінің орынбасары Алексей Оверчук мәлімдеді, деп хабарлады Азаттық Азия.

Оның айтуынша, Мәскеу сыртқы нарықтардағы шектеулерді жеңілдетумен қатар, ішкі нарықты «адал емес импорттан» қорғау шараларын күшейтіп жатыр. Әсіресе Еуразиялық экономикалық одақ елдері арқылы келетін тауарлар ресейлік өндірушілер үшін «әділетсіз бәсеке» туғызады деген уәж айтылды.

– Бұл уақытша науқан емес. Бақылау тұрақты негізде жүргізіледі. Бақылаудың әлсіреуін күткендер қателеседі, – деді Алексей Оверчук.

Оның сөзінше, 2025 жылдың қыркүйегінде Ресейдің Федералдық кеден қызметіне Ресей–Қазақстан және Ресей–Беларусь шекараларындағы мобильді топтардың жұмысын күшейту тапсырылған. Тексерістер Ішкі істер министрлігі, Росгвардия, Федералдық қауіпсіздік қызметінің шекара қызметі, сондай-ақ Россельхознадзор, Роспотребнадзор және Ространснадзор өкілдерінің қатысуымен жүргізіледі.

Сонымен қатар 2025 жылдың соңында Ресейдің мемлекеттік бақылау органдары мен Росаккредитацияға ЕАЭО елдерінде берілген сәйкестік сертификаттары мен декларацияларының әрекетін тоқтата тұру құқығы берілген. Оверчуктың айтуынша, бұл шара жасанды өнімдердің жолын кесуге бағытталған және қазірдің өзінде іске асырылып жатыр.