Ресей Қазақстанға қолма-қол рубль әкетуге шектеу қойды

Ресейден Қазақстанға жеке тұлғалардың қолма-қол әкете алатын рубль көлемі 1 млн рубльмен шектелді. Қазақстан Ұлттық банкінің бағамымен бұл шамамен 5,23 млн теңге. Жаңа талап азаматтығына қарамастан барлық жеке тұлғаға қолданылады.

1 млн рубльден артық соманы Ресейден тек белгіленген әуежайлар арқылы алып шығуға болады. Ол үшін ақшаның банк шотынан алынғанын растайтын банк көшірмесін көрсету қажет. Құрлықтағы шекара бекеттерінде мұндай мүмкіндік қарастырылмаған.

Компаниялар мен жеке кәсіпкерлерге қолма-қол рубльді Ресейден әкетуге сомасына қарамастан толық тыйым салынды. Тек халықаралық тасымалдарға және дипломатиялық өкілдіктердің жұмысын қамтамасыз етуге қатысты жағдайларға ерекшелік жасалған.

Талап бұзылса, жеке тұлғалардан белгіленген мөлшерден асқан ақша тәркіленеді. Ал заңды тұлғалардың қолындағы қолма-қол ақшаның барлығы алынуы мүмкін.

Мұндай шектеу Қазақстан мен Еуразиялық экономикалық одақтың басқа елдерінен бөлек, Әзербайжан, Тәжікстан және Өзбекстанға да қатысты енгізілген.