Ресей Байқоңырдан кете ме: «Роскосмос» басшысы не дейді?

«Роскосмос» Қазақстанмен Байқоңыр ғарыш айлағы бойынша ынтымақтастықты тоқтату туралы ақпаратты жоққа шығарды. Мемлекеттік корпорацияның бас директоры Дмитрий Баканов "Вести" басылымына берген сұхбатында Байқоңырдағы жұмысты қысқарту жоспарда жоқ екенін мәлімдеді.

Оның айтуынша, Ресей қазір үш ғарыш айлағын пайдаланады: Восточный, Плесецк және Байқоңыр. Үшеуіндегі де жұмысты жалғастыру көзделген. Байқоңырдан «Союз-2» зымырандары ұшырылып, жүктер мен ғарышкерлер Халықаралық ғарыш станциясына жеткізіледі.

Баканов Қазақстан мен Ресей тоғыз «Протон-М» зымыранын ұшыру жөнінде уағдаласқанын да айтты. Бұған қоса, екі ел Байқоңырдағы «Бәйтерек» кешенінен «Союз-5 – Сұңқар» зымыранын ұшыру жөніндегі бірлескен жобаны жүзеге асырып жатыр.

«Роскосмос» басшысы Қазақстанмен ғарыш саласындағы ынтымақтастықты дамытудың мүмкіндігі жоғары деп бағалады.

Ресей Байқоңырды Қазақстаннан 1994 жылдан бері жалға алып келеді. Қолданыстағы келісім бойынша ғарыш айлағын жалға алу мерзімі 2050 жылға дейін созылады. Жыл сайынғы жалдау ақысы 115 млн доллар.