Ресей аймақтарында әуе қорғанысы 555 дронды атып түсіргені хабарланды

Мәскеу мен Мәскеу облысы түн ішінде дрондардың жаппай шабуылына ұшырады. ТАСС агенттігінің мәліметінше, бұл соңғы екі жылдағы ең ірі әуе шабуылы болуы мүмкін.

Мәскеу мэрі Сергей Собяниннің хабарлауынша, дрондарға қарсы әрекет таңғы 04:36-дан бастап жүргізілген. Оның айтуынша, 08:12-ге дейін Мәскеу бағытына ұшқан шамамен 180 дрон атып түсірілген. Кейін тағы бірнеше аппараттың жойылғаны туралы ақпарат берілді. Кейбір дрондардың қалдықтары Мәскеудегі мұнай өңдеу зауыты аумағына түсіп, өрт шыққаны хабарланды. Сонымен қатар «Садовод» сауда орталығы аумағына да дрон бөлшектері құлаған.

Мәскеу облысының губернаторы Андрей Воробьев бірнеше елді мекенде де зақымдар тіркелгенін айтты. Жуковский, Люберцы, Электросталь, Чехов, Котельники және басқа аудандарда тұрғын үйлер мен инфрақұрылым нысандарына зиян келген. Мәскеу облысында жалпы 17 адам зардап шеккені белгілі болды. Бірқатары ауруханаға жеткізілген. Әртүрлі аудандарда тұрғын үйлер мен өндірістік нысандарда өрт пен зақымдану оқиғалары тіркелген. Ресей Қорғаныс министрлігінің дерегінше, түн ішінде жалпы 555 дрон әуе қорғанысы күштерімен жойылған.

Украина президенті Владимир Зеленский бұл шабуылды Ресейдің Украина қалаларына жасаған соққыларына «лайықты жауап» деп сипаттағаны хабарланды.