Ресей астығын отандық өнім деп шетелге экспорт жасаған фермерлер анықталды

Павлодар облысы бойынша экономикалық тергеп-тексеру департаментінің мәліметінше, аталмыш елдімекенде заңсыз астық импорты жиі орын алады. Атап айтқанда, шаруа қожалықтарына қатысты 12 қылмыстық іс қозғалып, 10 қылмыстық іс сотта қаралды. Мемлекетке келген залал сомасы – 4,1 млрд теңге, деп хабарлайды Kazinform.

Аймақтық шаруа қожалықтары ҚР Қылмыстық кодексінің 216-бабында көрсетілген қылмыстық жауапкершілікке сәйкес заңсыз әрекет жасап, отандық экономикаға зиян тигізген.

“Көптеген шаруа қожалықтары Ресейден келген астық өнімді отандық өнім деп жалған сөйлеп, Ауғанстан, Иран, Тәжікстан сынды елдерге экспорттаған. Біріншіден, бұл істер ішкі заңдарға сай емес. Екіншіден, шетелдік өнімді қазақстандікі деп экспорттау арқылы отандық экономикаға зиян келуде. Отандық астықтың шетелге экспорт жасалмауы, өтпеген тауардың құны құлдырауы сынды залал келтіретін әрекеттер осындай заңсыз істердің салдарынан туындайды”, – дейді Павлодар облысы бойынша экономикалық тергеп-тексеру департаментінің басшысы Ерік Есенов. 

“Ертіс” шаруа қожалығының басшысы жалған шот-фактура жасау арқылы 50 млн теңге өндіріп алған. Қомақты сомаға әйгілі брендтегі қымбат көліктер мен элиталық тұрғын үй иемденген. Бүгін де оның заңсыз ісі қаралып, үш жылға бас бостандығынан айырылды. Заңсыз мүліктері тәркіленіп, мемлекетке қайтарылатыны жеткізілді. 

Рахат Жора