«Референдум – 2026» онлайн марафоны: инклюзивті қоғам мен бала тәрбиесі тақырыптары кеңінен талқыланды

«Референдум – 2026» онлайн марафоны аясында қоғамдағы маңызды тақырыптар кеңінен талқылануда.Таңғы 09:00-де басталған медиа-шараның алғашқы үш сағатында сарапшылар инклюзивті қоғам қалыптастыру мен бала тәрбиесінің заманауи тәсілдері туралы пікір алмасты.

Онлайн марафон алғаш рет ерекше форматта басталып, студияда журналистерге робот-жүргізуші серіктес болды. Бұл жаңашылдық көрермендердің назарын аударып, медиа алаңға заманауи технологиялардың енгізіліп жатқанын көрсетті.

Ток-шоу алаңында «Инклюзивті қоғам» тақырыбы аясында ерекше қажеттілігі бар азаматтарға тең мүмкіндік жасау, қолжетімді орта қалыптастыру және қоғамдағы өзара құрмет мәдениетін дамыту мәселелері талқыланды. Сарапшылар инклюзияның білім беру жүйесінде, еңбек нарығында және қоғамдық өмірде маңызды рөл атқаратынын атап өтті.

Ал «Бала тәрбиесі: дәстүр мен заманауи әдістің қайшылығы» атты пікірталаста бүгінгі қоғамдағы тәрбие тәсілдерінің өзгеруі, ұлттық құндылықтар мен заманауи психологияның үйлесімі сөз болды. Отбасылық психолог Ержан Мырзабаев қазақ қоғамында дәстүрдің маңызы зор екенін, алайда уақыт өте кейбір әдет-ғұрыптардың өзектілігі өзгеруі мүмкін екенін айтты. Оның пікірінше, бала тәрбиесінде дәстүр мен заман талабын ұштастыру аса маңызды.

Марафон аясында алғаш рет ұйымдастырылған инновация алаңында да отандық өнертапқыштардың жобалары таныстырылды. Соның бірі – сал ауруы диагнозы бар адамдарға арналған арнайы жаңа арба. Жобаның авторы Мәулен Бектұрғановпен сұхбатты робот-жүргізуші жүргізіп, бұл бастаманың қоғам үшін маңызын атап өтті. Сұхбат соңында роботтың биі көрермендердің қызығушылығын тудырды.

Сонымен қатар марафон барысында Қазақстан Республикасының Орталық референдум комиссиясы жанындағы пресс-орталық референдумның өту барысы туралы ресми мәліметтер жариялап отыр. Онда дауыс беру учаскелерінің ашылуы, шетелдегі учаскелердің жұмысы және азаматтардың белсенділігі туралы ақпараттар ұсынылды.

Медиа шара мәдени бағдарламамен де толықтырылды. Көрермендерге ҚР Ұлттық Ұланының Ерлер хоры, электро домбыра орындаушысы Ақтоты Болышева, әнші Рухия Байдүкенова, «Жошы» этно-фольклорлық ансамблі және «Алтын домбыра» тобы өнер көрсетті. Музыкалық номерлер голограмма шоуымен әрленіп, көрермендерге ерекше әсер сыйлады.

Қоғамдағы өзекті мәселелерді талқылап, инновациялық жобаларды таныстыруды мақсат еткен «Референдум – 2026» онлайн марафоны 16 сағатқа созылып, түнгі 01:00-ге дейін жалғасады.