QyzPU Digital Lady технопаркінде жаңа зертханалар ашылды

2025 жылғы 2 қазанда Қазақ ұлттық қыздар педагогикалық университетінде цифрлық білім беруді жаңа деңгейге көтеруге бағытталған маңызды қадам жасалды. Университет жанындағы Digital Lady технопаркінде үш жаңа зертхана – Apple class, 3D Lab және Атомдық және ядролық физика зертханалары салтанатты түрде ашылды.

Жаңа бастама Мемлекет басшысы Қасым-Жомарт Тоқаевтың биылғы Жолдауында айтылған цифрландыру мен жасанды интеллектті енгізу жөніндегі стратегиялық мақсаттарға сай жүзеге асырылды.

Ашылу рәсіміне Ұлттық ғылым академиясының академиктері, жоғары оқу орындарының профессорлары және халықаралық серіктестер қатысты. Университет ректорының м.а. Сәбит Суатайдың айтуынша, зертханалар студенттердің теориялық білімін тәжірибемен ұштастыруға, заманауи технологиялармен жұмыс істеуіне, халықаралық хакатондар мен стартаптарға қатысуына мүмкіндік береді.

Apple class зертханасы iMac және iPad құрылғыларымен толық жабдықталған. Мұнда студенттер мобильді қосымшалар әзірлеуді, бағдарламалау мен графикалық дизайн негіздерін үйренеді.

3D Lab зертханасында білім алушылар үшөлшемді модельдеу, VR/AR технологияларын пайдалану және әлеуметтік маңызы бар жобалар дайындаумен айналыса алады.

Атомдық және ядролық физика зертханасы ядроның құрылымы мен қасиеттерін зерттеуге арналған. Мұнда студенттер атомдық спектрлерді талдау, Планк пен Ридберг тұрақтыларын анықтау сынды тәжірибелер жүргізеді.

Суатайдың айтуынша, бұл зертханалар тек инфрақұрылым емес, сонымен қатар студенттердің шығармашылығын дамытатын, еңбек нарығында бәсекеге қабілетті маман болып шығуына жол ашатын алаң болмақ.

Университет алдағы уақытта Apple, Autodesk, DAAD, Erasmus+ сияқты халықаралық ұйымдармен серіктестікті кеңейтіп, білім беру мазмұнын жаңғыртуға ниетті.