Qyran тұрғын үй кешеніндегі алаяқтық: төрт қызметкер 8–9 жылға сотталды

Астанада «Qyran» тұрғын үй кешеніндегі жылжымайтын мүлікті сату кезінде жасалған алаяқтық ісі бойынша сот үкімі шықты. «International Invest Company IIC» ЖШС-нің төрт қызметкері кінәлі деп танылып, 8 жылдан 9 жылға дейін бас бостандығынан айырылды, деп хабарлады Қаржылық мониторинг агенттігі.

Тергеу дерегіне сәйкес, сотталғандар сатып алу-сату шарттарының орнына мемлекеттік тіркеуге жатпайтын және сатып алушыларға меншік құқығын бермейтін брондау шарттарын, кепілақы туралы келісімдер мен алдын ала шарттарды рәсімдеген.

Сату кеңсесінде әлеуетті сатып алушыларға нысандардың макеттері, техникалық паспорттар, сенімхаттар және компанияның жылжымайтын мүлікке меншік құқығын растайтындай құжаттар көрсетілген. Азаматтарға пәтерлер, тұрғын емес үй-жайлар мен автотұрақ орындары нарық бағасынан төмен ұсынылып, мәмілелердің заңды екеніне сендірген.

Жәбірленушілер ақшаны қолма-қол немесе алаяқтық сызбаға қатысушылардың жеке есепшоттарына аударған. Бұл төлемдер компанияның бухгалтерлік және банктік құжаттарында көрсетілмеген.

Сот материалдарына сәйкес, сотталғандар құрылыс салушы компанияның қаражатын иемденуге бағытталған екінші сызбаны да қолданған. Олар компания атынан клиенттермен жалған сатып алу-сату шарттарын жасап, жылжымайтын мүлікке меншік құқығын тіркеген. Алайда сатудан түскен қаражат компания кассасына түспеген.

Сот 35 жәбірленушінің жалпы сомасы 2,2 млрд теңгеден асатын талап арыздарын қанағаттандырды. Сонымен бірге «International Invest Company» ЖШС пайдасына 3,9 млрд теңге өндіріп алу туралы шешім шығарылды.

Жәбірленушілерге жалпы құны 1,3 млрд теңге болатын 78 жылжымайтын мүлік нысаны берілген. Тағы 73 нысан адал ниетті сатып алушыларға берілді.

Сот үкімі әзірге заңды күшіне енген жоқ.