Qrnews.kz журналисі “Астана Тазалық” ұйымдастырған байқауда жүлдегер атанды

Астанада Тәуелсіздік күні қарсаңында және «Жұмысшы мамандықтар жылы» аясында өткен «Таза сана – Таза қала» атты журналистер мен блогерлерге арналған байқаудың қорытындысы шықты. Байқауда Qrnews.kz порталының журналисі Дулат Абдраманов "Әлеуметтік желілердегі үздік жарияланым" номинациясында жүлдегер атанды.

Байқаудың басты мақсаты – елордадағы тазалық пен тәртіпті қамтамасыз етіп жүрген коммуналдық сала қызметкерлерінің еңбегін кеңінен насихаттау және еңбек адамдарының мәртебесін арттыру болды.

Байқауға еліміздің түрлі өңірінен 122 журналист пен блогер қатысып, 150-ден астам материал ұсынылды. Жұмыстар тақырыптың өзектілігіне, мазмұнының тереңдігіне, жазу шеберлігіне және авторлық көзқарасқа қарай бағаланған.

Салтанатты марапаттау рәсімінде «Астана Тазалық» ЖШС бас директоры Замир Сағинов сөз сөйлеп, қаланы таза ұстау жолында еңбектеніп жүрген жұмысшылар мен олардың еңбегін дәріптеп жүрген журналистерге алғыс айтты.

«Биыл 2025 жылды Президентіміз «Жұмысшы мамандықтар жылы» – деп жариялады. Бұл – күн сайын қаланы тазалап, көшені жуып, қоғам үшін үнсіз еңбек етіп жүрген қарапайым жұмысшының абыройын көтеру деген сөз. Артқа көз салсақ, ағымдағы жылы «Астана Тазалық» туралы ақпарат кеңістігінде 487 материал жарық көрді. Соның 370-і – қарапайым қызметкерлер туралы. Яғни, БАҚ өкілдері күн сайын бір жұмысшының еңбегін елге көрсетіп отырды. Бұл үлкен еңбек. Сол еңбек адамының еңбегін елге жеткізіп жүрген сіздерге – журналистерге, блогерлерге – шын жүректен рақмет айтамын», – деді ол.», – деді ол.

Биылғы байқауға қатысушылар саны өткен жылмен салыстырғанда екі есеге артқан. Бұл – қоғамда экология мен еңбек тақырыбының өзектілігі жоғары екенін көрсетті.

Жеңімпаздар мен жүлдегерлерге «Астана Тазалық» компаниясының арнайы сыйлықтары мен марапаттары табысталды. Байқау жыл сайын дәстүрлі түрде өткізіліп, қаланың тазалығына, экологиялық мәдениетке және еңбек адамының беделін арттыруға бағытталған.