Qazaq Air Екатеринбургке рейстерді қаңтардың соңына дейін тоқтатты

Qazaq Air әуе компаниясы 2024 жылдың 28 желтоқсанынан 2025 жылдың 27 қаңтарына дейін Астана – Екатеринбург бағыты бойынша рейстерді уақытша тоқтатты. Бұл шешім жолаушылар мен экипаж мүшелерінің қауіпсіздігін қамтамасыз ету мақсатында қабылданған. Бұл туралы компанияның баспасөз қызметі хабарлады.

«Qazaq Air әуе компаниясы Астана – Екатеринбург бағыты бойынша рейстерді 2024 жылғы 28 желтоқсаннан 2025 жылғы 27 қаңтарға дейін уақытша тоқтатуға мәжбүр. Рейстерді тоқтату жолаушылар мен экипаж мүшелерінің қауіпсіздігін қамтамасыз ету мақсатында, Ресейге ұшу қауіптерін тұрақты бағалау нәтижесінде қабылданды», – делінген хабарламада.

Сонымен қатар Qazaq Air Омбы мен Новосібірге рейстерді жалғастыратынын мәлімдеді. Бұл бағыттар компанияның қауіп-қатерлерді бағалау критерийлеріне сәйкес келеді.

Екатеринбургке рейстерді қайта жандандыру туралы шешім қауіп-қатерлерді қайта бағалау нәтижесі бойынша қабылданатын болады.