Путин соғысты тоқтату шартын айтты

Ресей президенті Владимир Путин Украинаға қарсы соғысты тек украин әскері Донбастан кеткен жағдайда ғана тоқтататынын мәлімдеді. Бұл туралы ол 27 қараша күні Бішкекте өткен баспасөз мәслихатында айтты.

«Украина әскері өздері басып алған аумақтардан шыққанда ғана әскери әрекеттер тоқтатылады. Егер шықпаса, біз оны қарулы жолмен жүзеге асырамыз», – деді Путин.

Ресей басшысы Мәскеу «келісімге келуге дайын» екенін, бірақ қазіргі жағдайда бұл «заңдық тұрғыда мүмкін емес» екенін айтты. Сонымен бірге ол Украина президенті Владимир Зеленскийдің легитимдігіне күмән келтіріп, Украина басшылығы «сайлаудан қорқып, стратегиялық қателік жіберді» деп мәлімдеді.

«Құжаттарға қол қоюдың мәні жоқ. Қазіргі украин басшылығы өз өкілеттігін заңды түрде ұзартқан жоқ», – деді Путин.

Украина заңнамасы не дейді

Украина президенті Владимир Зеленскийдің бес жылдық өкілеттік мерзімі 2024 жылғы 20 мамырда аяқталды. Алайда Украина заңына сәйкес, әскери жағдай кезінде президенттік, парламенттік және жергілікті сайлаулар өткізуге тыйым салынады.

Украина Конституциясының 108-бабына сай, президент жаңа мемлекет басшысы сайланып, ант бергенге дейін өз міндетін атқара береді. Сондықтан халықаралық құқық нормалары тұрғысынан Зеленскийдің өкілеттігі заңды болып саналады.

Ресей мен АҚШ келіссөздері туралы

Путиннің айтуынша, АҚШ пен Украина арасындағы Женевадағы келіссөздердің нәтижелері болашақ келісімдердің негізіне айналуы мүмкін.

«Америкалық тарап 28 тармақтан тұратын ұсыныстарды төрт блокқа бөліп, Мәскеуге берді. Қазір нақты шешім жоқ», – деді Путин.

Сондай-ақ Ресей басшысы Мәскеудің Еуропаға шабуыл жасамауға уәде беруге дайын екенін айтты.

«Бұл күлкілі естіледі, өйткені біз ондайды ешқашан жоспарлаған емеспіз. Бірақ егер олар жазбаша түрде естігісі келсе, біз қағазға түсіруге дайынбыз», – деді ол.

Reuters агенттігінің хабарлауынша, АҚШ-тың бастапқы 28 тармақтан тұратын жоспары Украинамен кеңесуден кейін қысқартылған. Киев Мәскеудің үш басты талабын қабылдамаған:

– Украина Қарулы күштерінің санын шектеу,

– НАТО-ға мүше болудан бас тарту,

– Донбастан шығу және оны Ресейге беру.

Президент Владимир Зеленский бұл мәселелерді АҚШ президенті Дональд Трамппен талқылауға тырысқанымен, ол Киевтің ұсынысына жауап бермеген.