Путин мен Зеленский екі аптадан кейін кездеседі: Трамп пен Зеленскийдің кездесуі немен аяқталды?

АҚШ президенті Дональд Трамп Украина басшысы Владимир Зеленский және бірқатар Еуропа елдерінің жетекшілерімен өткен кездесуді аяқтады. Кездесуден кейін Трамп Ресей президенті Владимир Путинге қоңырау шалып, шамамен 40 минут сөйлескен.

Трамптың айтуынша, алдағы уақытта Ресей, Украина және АҚШ қатысатын үшжақты кездесу өткізу жоспарланып отыр. Бұл келіссөз Путин мен Зеленскийдің жеке кездесуінен кейін ұйымдастырылмақ. Германия канцлері Фридрих Мерц екі ел басшыларының келіссөзі алдағы екі аптада өтетінін мәлімдеді.

Владимир Зеленский алғаш рет атысты тоқтату талабын міндетті шарт ретінде қоймайтынын ашық айтты. Сондай-ақ ол Украинаға қауіпсіздік кепілдіктерінің он күн ішінде нақты пысықталатынын жеткізді. Киев бұл кепілдіктің бір бөлігі ретінде 90 млрд доллар көлемінде әскери көмек алуды көздеп отыр.

АҚШ сенаторы Марко Рубионың сөзінше, Вашингтон енді Украинаға қаруды тегін бермейді, тек еуропалық қаржыландыру арқылы сатады. Осы келісім аясында Украина 100 млрд доллардың қаруын сатып алуға уәде еткен, ал қаржыландыруды Еуропа қамтамасыз етеді.

Нидерланд премьер-министрі Марк Рютте келіссөздерде аумақтық мәселелер қарастырылмағанын айтты. Оның сөзінше, Киевтің келесі қадамдары қауіпсіздік кепілдіктерінің мазмұнына байланысты болмақ. Сондай-ақ еуропалық немесе америкалық әскерді Украинаға жіберу тақырыбы мүлде талқыланбаған.

Трамп бір-екі апта ішінде Украинадағы қақтығысты реттеу перспективасы айқын болатынын атап өтті.