Путин Қазақстан және Өзбекстанмен әскери келісімдерді қайта қарауды тапсырды

Ресей президенті Владимир Путин Қазақстан және Өзбекстанмен әскери-техникалық ынтымақтастық туралы қолданыстағы келісімдерге өзгеріс енгізу жөнінде келіссөз бастауға тапсырма берді. Тиісті өкімдер 27 шілдеде Ресейдің құқықтық ақпарат порталында жарияланды. Бұл өзгерістерге The Insider басылымы назар аударды.

Құжатта Ресей үкіметіне Қазақстанмен 2013 жылғы 24 желтоқсанда жасалған келісімді өзгерту жөнінде келіссөз жүргізуге рұқсат берілген. Қандай тармақтарды қайта қарау көзделгені әзірге нақтыланбаған.

Қолданыстағы келісім қару-жарақ пен әскери техниканы жеткізу, әскери мақсаттағы өнім алмасу, технологиялар мен құжаттаманы беру тәртібін реттейді. Сондай-ақ әскери техниканы жөндеу және жаңғырту, бірлескен зерттеу жұмыстарын жүргізу, өндіріс орындарын құру және мамандар даярлау мәселелерін қамтиды.

Қазақстан мен Ресей арасындағы әскери-техникалық ынтымақтастық туралы келісім 2013 жылы жасалып, 2015 жылы бекітілген. Қазақстан Ұжымдық қауіпсіздік туралы шарт ұйымына мүше болғандықтан, екіжақты байланыс ортақ қорғаныс тетіктерімен де сабақтас.

Қазақстан тарапының ұсынылған өзгерістерге қатысты ұстанымы әзірге жарияланған жоқ.