Путин Каспийдегі қайғылы оқиғаға байланысты Тоқаевқа көңіл айтты

Ресей президенті Владимир Путин Каспий теңізіндегі оқу-жаттығу кезінде қазақстандық әскери қызметшілердің қаза табуына байланысты Президент Қасым-Жомарт Тоқаевқа көңіл айтты. Бұл туралы Кремльдің баспасөз қызметі хабарлады.

Путин Тоқаевқа жолдаған жеделхатында қаза тапқан әскери қызметшілердің туған-туыстарына қолдау білдірді.

«Қазақстан Әскери-теңіз күштерінің Каспийдегі оқу-жаттығуы кезінде болған қайғылы оқиғаға байланысты көңіл айтуымды қабыл алыңыз. Қаза тапқан әскери қызметшілердің туған-туыстарына шынайы жанашырлық пен қолдау сөздерін жеткізуіңізді сұраймын. Ресей олардың қайғы-қасіретін бөліседі», – делінген жеделхатта.

Қасым-Жомарт Тоқаев Владимир Путинге көңіл айтқаны үшін ризашылығын білдірді. Мемлекет басшысы ел үшін ауыр сәтте Қазақстан Ресей басшысы мен халқының тілектестігі мен қолдауын ерекше бағалайтынын атап өтті.

Еске салайық, 24 қыркүйекте Маңғыстау облысында Әскери-теңіз күштерінің оқу-жаттығуы кезінде 12 әскери қызметші қаза тапты. Үш адам құтқарылды, тағы екі әскери қызметшіні іздеу жалғасып жатыр. Қаза тапқандарды еске алу үшін 25 қыркүйек Қазақстанда жалпыұлттық аза тұту күні болып жарияланды.