Путин Арменияны ЕО мен ЕАЭО арасында таңдау жасауға шақырды

Ресей президенті Владимир Путин Арменияда Еуропа одағына кіру немесе Еуразия экономика одағы құрамында қалу мәселесі бойынша жалпыхалықтық референдум өткізудің маңызды екенін айтты. Бұл мәселе Путин мен Армения премьер-министрі Никол Пашинянның телефон арқылы сөйлесуі кезінде талқыланды.

Армения үкіметінің мәліметінше, Пашинян мұндай дауыс беру ел Еуропа одағына мүше болуға ресми өтініш бергеннен кейін және мәселе нақты сипат алған кезде ғана мүмкін екенін жеткізген. Референдум өткізу жөніндегі ұсыныс мамырда ЕАЭО-ға мүше төрт ел басшылары қабылдаған ортақ мәлімдемеде де айтылған. 

Телефон әңгімесінде Пашинян Ресейдің армян тауарларына енгізген шектеулерін де көтерді. Ол бұл шаралар екі ел арасындағы келісімдер мен ЕАЭО талаптарына қайшы екенін айтып, мәселені шешу үшін шара қабылдауды сұрады. 

Кейінгі айларда Ресей Армениядан жеткізілетін бірқатар тауарға, соның ішінде жеміс-жидек, гүл, алкоголь өнімдері мен басқа да тауарларға шектеу енгізді. Бұл шаралар Арменияның Еуропа одағымен жақындасуы аясында Мәскеу мен Ереван арасындағы қатынас шиеленіскен тұста қабылданды. 

Пашинян бұған дейін Армения Еуропа одағына ресми өтініш бермейінше немесе үміткер ел мәртебесіне жақындамайынша референдум өткізуді орынсыз деп санайтынын айтқан.