Прокурорлар балалар үйлерін түнде де бақылайды

Қазақстанда прокуратура органдары халықпен байланысын күшейтіп, азаматтардың құқықтарын қорғауға бағытталған жаңа қадамдар жасап жатыр. Бұл туралы Бас Прокурордың орынбасары Жандос Өмірәлиев Kazinform агенттігінің BIZDIÑ ORTA подкастында мәлімдеді.

Оның айтуынша, прокуратура енді қылмыстық қудалаумен шектелмей, қоғамдағы әділетсіздікті болдырмауға, азаматтардың мұң-мұқтажын тыңдауға баса мән беріп отыр.

– Бұрын прокуратура халық арасында тек жазалау органымен байланыстырылса, қазір бұл орган – азаматтардың құқығын қорғайтын, әділеттілікті қамтамасыз ететін сенімді құрылымға айналды, – деді Жандос Өмірәлиев.

Ол прокуратураның қоғаммен тығыз байланыс орнату үшін арнайы қабылдау орталықтары жұмыс істеп тұрғанын атап өтті. Сонымен қатар, прокуратураның Call-орталығы мен әлеуметтік желілердегі ресми парақшалары арқылы кез келген азамат Бас Прокурордың атына тікелей өтініш жолдай алады.

Ең басты жаңалықтардың бірі – прокурорлар балалар үйлеріне түнгі уақытта да сырттай бақылау жүргізе бастады.

– Қарттар мен балалар үйлеріне барып, ондағы ахуалды өзіміз зерттеп, бақылап жүрміз. Балалар мекемелеріне кейде кешкі немесе түнгі уақытта сырттай бақылау жасаймыз. Мақсат – балалардың құқығы қорғалып жатыр ма, жоқ па, соны анықтау. Бұл ретте біз шағымды күтпей, өзіміз қоғамға шығып, мәселенің алдын алуға тырысамыз, – деді Бас Прокурордың орынбасары.