Прокурор Перизат Қайратты 10 жылға бас бостандығынан айыруды сұрады

Мемлекеттік айыптаушылар Перизат Қайрат пен Ғани Алашбаеваға қатысты сот процесінде жаза мерзімдерін ұсынды. Бұл жөнінде informburo хабарлады.

Прокурор Арман Кезекеннің айтуынша:

• Перизат Қайратқа – 10 жыл,

• Ғани Алашбаеваға – 8 жыл бас бостандығынан айыру жазасы тағайындалуы тиіс.

Жаза мерзімдері қылмыстар жиынтығы бойынша, ішінара қосу арқылы есептелді.

"Жасалған қылмыстардың қауіпті сипатын ескере отырып, айыптау тарапы сотталушыларға нақты түрме жазасын тағайындау қажет деп санайды. Мұндай ауқымды алаяқтық қоғамдық мүддеге және моральдық құндылықтарға жасалған өрескел шабуыл. Бұл – тек материалдық шығын ғана емес, халықтың көмек пен қайырымдылық институттарына деген сеніміне, әділетке деген үмітіне нұқсан келтірді, – деді прокурор Кезекен.

Оның сөзінше, кейіннен қылмыстық жолмен алынған табыстарды заңдастыру – Қайрат пен Алашбаеваның әрекеттерінде жоғары деңгейдегі жоспарлауды, ұйымдасқандықты және батылдықты көрсетеді.

"Сотталушылар өз кінәсін мойындаған жоқ, жасаған ісіне өкінбейді. Келтірілген шығынды өтеу үшін нақты әрекеттерге бармаған. Мұндай мінез-құлық – түзелуге талпыныстың жоқтығын білдіреді", – деді ол.

Прокурорлар қылмыстық жолмен табылған мүлікті тәркілеуді және ол қаражатты жәбірленушілерге беруді талап етті.

Сотталушыларға мынадай баптар бойынша айып тағылған:

• Қылмыстық кодекстің 190-бабы 4-бөлігі 2-тармағы – «Өте ірі көлемде жасалған алаяқтық»;

• 218-баптың 2-бөлігі 1-тармағы – «Алдын ала сөз байласқан адамдар тобының қылмыстық жолмен алынған ақшаны және мүлікті заңдастыруы»;

• 218-баптың 3-бөлігі 3-тармағы – «Өте ірі көлемде жасалған ақшаны және мүлікті заңдастыру».