Прокурор блогер Әділетхан Молдаханға тағылған айыпты ауырлатты

Алматының Алмалы аудандық қылмыстық істер сотында блогер Әділетхан Молдаханға қатысты айып қайта сараланды. Бұл туралы сот отырысында мемлекеттік айыптаушы мәлімдеді, деп хабарлады informburo.kz.

Бұған дейін блогерге интернет-платформалар арқылы жалған ақпарат таратты деген айып тағылған болатын. Енді прокурор істі жалған ақпарат тарату ауыр зардаптарға немесе ірі залалға әкелді деген бап бойынша қарауды сұрады. Бұл бап бойынша бес жылға дейін бас бостандығын шектеу немесе айыру жазасы қарастырылған.

Айыптың өзгеруіне байланысты сот отырысы кейінге шегерілді. Қорғаушы тарапқа жаңа айып бойынша ұстанымын әзірлеуге уақыт беріліп, келесі сот отырысы 9 шілдеге белгіленді.

Блогердің адвокаты Нұртуған Өмірзақтың айтуынша, прокурор айыптан жауапкершілікті ауырлататын мән-жайларға қатысты норманы алып тастаған. Оның пікірінше, бұл сотқа жеңілдетілген жаза қолдануға мүмкіндік беруі мүмкін. Сондай-ақ қорғаушы соттан Әділетхан Молдаханның қамауда өткізген уақытын ескеруді сұрайтынын айтты.

Іс Әл-Фараби даңғылындағы адам өліміне әкелген жол апатынан кейін жарияланған бейнежазбаларға байланысты қозғалған. Блогер әлеуметтік желіде жол жарысын ұйымдастыруға құқық қорғау органдарының қызметкерлері қатысы болуы мүмкін деген мәлімдеме жасаған.

Аталған жол апаты 21 наурызға қараған түні болды. Қарсы бағытқа шыққан Zeekr көлігі Mercedes-Benz автокөлігімен соқтығысып, салдарынан үш адам қаза тапты. Кейін Ішкі істер министрлігі Алматы полициясының бірнеше басшысын қызметінен босатып, полиция басшыларының бірінің жүргізушісіне қатысты әрекетсіздік фактісі бойынша қылмыстық іс қозғады. Апатқа себепкер болған Александр Пак кінәсін толық мойындап, 10 жылға бас бостандығынан айырылды.