Прокуратура: Шерзат Полат ісі бойынша тергеу аяқталуға жақын

Алматы облысының прокуратурасы Талғарда биыл күзде қайғылы қазаға ұшыраған Шерзат Полаттың ісі бойынша тергеудің аяқталуға жақын екенін мәлімдеді. Тергеу барысында алдымен сараптама нәтижелері дайындалуы қажет, содан кейін ғана тараптарға іс материалдарымен танысуға мүмкіндік беріледі.

Сонымен қатар, марқұмның әкесі Қаржаубай Нұрымовтың өртенген үйі және оның інісі Нұрғанат Ғайыпбаевтың жұмбақ өліміне қатысты қылмыстық істерді Бас прокуратура бақылауға алғанын хабарлады.

Прокуратура азаматтарға жалған ақпарат таратпауды және тек ресми дереккөздерге сүйенуді ескертті.

Айта кетейік, 11 желтоқсанда Қаржаубай Нұрымов 15 тәулікке әкімшілік қамауға алынып, кейін оның үстінен қылмыстық іс қозғалды. Онымен бірге екі туысы да 15 күнге қамауға алынды, ал тағы бір туысына айыппұл салынды. Қамауға алынғандардың бірі Қазақстаннан депортациялануы мүмкін.