Прокуратура Қазақстан футбол федерациясында миллиардтаған қаржы жымқырылғанын әшкереледі

Бас прокуратура Қазақстан футбол федерациясы мен бірқатар футбол клубына жүргізілген тексеріс нәтижелерін жариялады. Тексеріс барысында жалпы сомасы 3 млрд теңгеден асатын қаржылық заң бұзушылықтар мен тиімсіз басқару фактілері анықталды.

Прокуратураның хабарлауынша, негізгі бұзушылықтардың қатарында негізсіз төленген сыйақылар, инфрақұрылым нысандарын салу кезінде қаржыны мақсатсыз пайдалану, футболшылармен күмәнді келісімшарттар жасау, сондай-ақ спортшылардың тамақтануына бөлінген ақшаның ұрлануы бар.

Атап айтқанда, федерацияның бұрынғы басшылығы жекелеген қызметкерлер мен спортшыларға еш негізсіз жалпы сомасы 300 млн теңгеден астам сыйақы тағайындаған.

Сонымен қатар Алматы облысы Талғар қаласында футбол федерациясының әкімшілік ғимараты мен жаттығу базасын салу кезінде іс жүзінде орындалмаған жұмыстар үшін 350 млн теңгеден астам қаржы төленгені белгілі болды. 2021 жылы басталған бұл базаның құрылысы қазір тоқтап тұр, ал мердігер компанияның есепшоттары бұғатталған.

Одан бөлек, стратегиялар мен стандарттар әзірлеуге жұмсалған 135 млн теңге де тиімсіз пайдаланылған. Құжаттарда нақты іске асыру механизмдері, соның ішінде жеке инвестициялар тарту жолдары көрсетілмеген, ал клубтарды басқару стандарты практикада енгізілмеген.

«Сондай-ақ «Ордабасы», «Ақтөбе» және «Жетісу» футбол клубтарында жүргізілген тексеріс барысында келісімшарттардағы сомалардың негізсіз ұлғайтылғаны, ойыншылардың нарықтық құнынан төмен сатылып, қымбат бағаға сатып алынғаны және қаржыны жымқыру фактілері анықталды», – деп хабарлады Бас прокуратура.

Барлық анықталған фактілер бойынша сотқа дейінгі тергеу басталды. Федерацияның бұрынғы басшыларына қатысты қылмыстық іс Қаржы мониторингі агенттігіне жіберілді.

Айта кетейік, наурыз айының басында Қаржы мониторингі агенттігі Қазақстан футбол федерациясының бұрынғы басшылығына қатысты тергеу басталғанын мәлімдеген болатын. Бірақ нақты деректер жарияланбаған еді.