Президент «Жасанды интеллект туралы» заңға қол қойды: нені білу керек

Мемлекет басшысы «Жасанды интеллект туралы» Қазақстан Республикасының Заңына қол қойды. Бұл құжат елде жасанды интеллект жүйелерін дамыту мен пайдаланудың құқықтық және этикалық негізін қалыптастырады.

Жаңа заң арқылы жасанды интеллект жүйелерінің қызметінің негізгі қағидаттары бекітілді. Енді жасанды интеллект – адамның белгілі бір міндеттерді орындауына көмектесетін ақпараттандыру нысаны және құрал ретінде танылады.

Заңда жауапкершілік пен бақылау қағидаттары нақты айқындалған. Жасанды интеллект жүйелерін иеленушілер мен пайдаланушылар олардың қауіпсіздігі, сенімділігі және тәуекелдерді басқару үшін өз рөліне сай жауап береді.

Құжатта сондай-ақ заңдылық, әділеттілік, теңдік, ашықтық, адам игілігіне басымдық беру, деректерді қорғау мен құпиялылықты сақтау сияқты қағидаттар бекітілген.

Бұдан бөлек, заң жеке және заңды тұлғалардың құқықтарын қорғау мақсатында түпсаналық, манипуляциялық немесе жеке деректерді заңсыз жинау мен өңдеу сияқты зиянды функциялары бар жасанды интеллект жүйелерін құруға және пайдалануға тыйым салады.

Сонымен қатар, жасанды интеллект арқылы жасалған тауарлар мен қызметтерді арнайы таңбалау талабы енгізілді. Бұл тұтынушылардың мұндай өнімдер туралы хабардар болуын қамтамасыз етеді.

Жаңа заң ұлттық жасанды интеллект платформасын құрудың да құқықтық негізін айқындайды. Платформа белгілі бір мерзім ішінде бағдарламалық өнімдерді, жасанды интеллект модельдерін әзірлеу, оқыту және сынақтан өткізу мақсатында жұмыс істейді.

Құжаттың толық мәтіні ресми баспасөзде жарияланады.