Президент Түркістан облысының әкіміне тұрғындардың тұрмыс деңгейін жақсартуды тапсырды

Мемлекет басшысы Қасым-Жомарт Тоқаев Түркістан облысының әкімі Нұралхан Көшеровті қабылдап, өңірдің әлеуметтік-экономикалық дамуы жөніндегі баяндамасын тыңдады.

Облыс әкімінің баяндамасынан:

• Ислам даму банкі 135,5 миллиард теңгеге 24 ирригациялық жобаны қаржыландыруды мақұлдады.
• Түркістан қаласы мен жақын маңдағы 6 ауданды сумен тұрақты қамтамасыз ету мақсатында «Бәйдібек ата» су қоймасының құрылысы жүргізіліп жатыр.
• Мақта-тоқыма кластерінде құны 197 миллиард теңгені құрайтын 5 жоба іске асырылады.
• Жүгері-сірне зауытының құрылысы басталды.
• Австралия тәжірибесіне сай ет бағытындағы мал шаруашылығын дамыту қолға алынған.
• Биыл облыста 32 мектеп салынып, 41 білім ошағына күрделі жөндеу жүргізіледі.
• Медициналық-санитарлық алғашқы көмек көрсететін 32 нысан пайдалануға беріледі.
• 45 елді мекенге табиғи газ құбыры тартылады.

Қасым-Жомарт Тоқаев облыс әкімдігіне кеше қол қойылған «Түркістан қаласының ерекше мәртебесі туралы» Заң аясында Үкіметпен тығыз қарым-қатынаста жұмыс істеуді тапсырды.

Мемлекет басшысы сондай-ақ өңір тұрғындарының тұрмыс сапасын арттыру, туризмді, ауыл шаруашылығын және шағын кәсіпкерлікті дамыту, елді мекендерді ауыз сумен қамтамасыз ету мәселелеріне ерекше назар аударуды жүктеді.