Президент Тоқаев Түркістандағы жаңа мешіттің атын қойды

Түркістан қаласында Өзбекстан Президенті Шавкат Мирзиёевтің қазақ халқына тартуы ретінде бой көтерген жаңа зәулім мешіт ашылды. Түркі мемлекеттері ұйымының бейресми саммиті аясында Мемлекет басшысы Қасым-Жомарт Тоқаев бұл рухани нысанға «Миромон» есімін беруді ұсынды.

Қасым-Жомарт Тоқаев өз сөзінде бұл бастаманың маңыздылығына тоқталып, былай деді:

«Біз киелі ортаның тарихы қандай терең болса, болашағы да сондай жарқын боларына нық сеніммен айта аламыз. Осы мүмкіндікті пайдаланып, бүгін Түркістанда Өзбекстанның қолдауымен жаңа зәулім мешіттің ашылғанын үлкен ризашылықпен атап өткім келеді. Бұл – қазақ-өзбек халықтары ынтымағының тарихи символы. Менің пікірімше, бұған Миромон ата аты берілсе, өте орынды болар еді. Біз бұл қасиетті нысан арамыздағы мәңгілік достыққа қызмет ететініне сенімдіміз».

Мешіт кешені заманауи инженерлік инфрақұрылыммен толық жабдықталған. Мұнараларының биіктігі 61 метрді құрайтын ғибадатхананың ішкі және сыртқы қабырғалары ұлттық нақыштармен және мұсылмандық каллиграфия элементтерімен безендірілген. Сондай-ақ, мешіт маңында келушілерге арналған демалыс аймақтары, су бұрқақтар мен жасыл желектер орнатылған.

Президенттің бұл ұсынысы екі ел арасындағы рухани байланысты нығайтып, ортақ тарих пен мәдениеттің жаңғыруына жаңа серпін бермек.