Президент тапсырмасы орындалды Абай өңірі елде жоқ әскери жобаны бірінші болып жүзеге асырды

Семей қаласындағы Мемлекеттік рәміздер алаңында еліміздің әскери саласындағы ерекше оқиға орын алды. Мемлекет басшысы Қасым-Жомарт Тоқаевтың армиялық дәстүрлерді қайта жаңғырту және жастарды отансүйгіштікке баулу бағытындағы тапсырмасына сәйкес, Абай облысы «Сарбаз жолы» деп аталатын жаңа жобаны алғаш болып бастап берді. Бұл – бұрынғы дәстүрлі шығарып салу рәсімдерінен мүлдем өзгеше, мазмұны мен мәні терең жаңа формат.

Жаңа жоба аясында ел корғауға аттанған алғашқы 60 жас сарбазға ақ жол тілеу үшін өңір басшысы Берік Уәли, ҚР Қорғаныс министрлігі Тәрбие және идеологиялық жұмыс департаментінің бастығы Тілеухан Басқожаев, әскери қолбасшылар, ардагерлер мен ата-аналар арнайы жиналды. Мұндағы басты мақсат – Отан алдындағы борышын өтеуге аттанған жастардың бойында мақтаныш сезімін оятып, әскери қызметтің беделін арттыру.

Жиын барысында облыс әкімі бүгінгі сарбаздар үшін мемлекет тарапынан жасалып жатқан бұрын-соңды болмаған жеңілдіктерге тоқталды. Институционалды қолдаудың арқасында әскерде болған жастар тегін білім гранттарына ие болып, жоғары оқу орындарына ешқандай ҰБТ-сыз түсе алады, сондай-ақ келісімшарт бойынша әскери мансап құруға мүмкіндік алады. Оған қоса, Қорғаныс министрлігінің өкілдері ата-аналарға әскердегі қауіпсіздік мәселесі толық бақылауда екенін жеткізіп, алаңдауға негіз жоқ екенін атап өтті.

Еске салсақ, ағымдағы күзгі шақыру науқаны аясында Абай облысынан 1500-ден астам, ал республика бойынша 21 мыңнан астам жас азамат әртүрлі әскери құрылымдар қатарына тартылады. Салтанатты іс-шара соңында аймақ басшысы әскерге аттанған әрбір жасқа арнайы естелік кітаптарды табыс етті.