Президент қазақстандықтардың жеке мәліметтерінің сенімді жерде сақталуын қамтамасыз етуді тапсырды

Мемлекет басшысы Қасым-Жомарт Тоқаев интернет және телефон алаяқтығының алдын алу мәселесін ерекше назарға алып, азаматтардың жеке мәліметтерін қорғау – мемлекеттің маңызды міндеттерінің бірі екенін айтты.

Президенттің айтуынша, бүгінде қаржылық алаяқтықпен айналысатын қылмыстық топтар көбінесе шетелден әрекет етеді, бұл тергеу процесін қиындатады. Сондықтан алаяқтықтың алдын алу бағытындағы жұмыстар жүйелі түрде күшейтілуі қажет.

– Өткен жылы Ұлттық банк жанынан заманауи антифрод-орталық ашылды. Ол күмәнді операцияларды анықтап, бұғаттап отырады. Сонымен қатар өз инфрақұрылымын пайдалана отырып жасалған алаяқтық үшін банктер мен ұялы байланыс операторларына жауапкершілік жүктеледі, – деді Президент.

Тоқаев азаматтардың жеке мәліметтерін қорғау және олардың қаржылық сауатын арттыру үшін барлық деңгейдегі депутаттармен бірлескен жұмысты күшейту қажеттігін айтты. Себебі алаяқтар адамдарды пайда уәдесімен алдап, олардың банк шоттарын пайдаланып, ақшаны жылыстатуға тырысады.

– Соңғы бір жарым жылда 50 мыңнан астам адам осындай алаяқтардың құрбанына айналды. Өкінішке қарай, олардың басым бөлігі – жастар. Қаржы нарығын реттеу және дамыту агенттігі банктермен бірге күмәнді шоттарды алдын ала анықтап, бұғаттау жүйесін енгізуі қажет, – деді Президент.

Мемлекет басшысы бақылаусыз сим-карта айналымы да қауіптің бір көзі екенін атап өтті. Тек биылдың өзінде 100 мыңға жуық сим-карта басқа адамдардың атына рәсімделгені анықталған. Бұл нөмірлер түрлі қылмыстық мақсатта қолданылып жатыр.

Осыған байланысты Президент Үкіметке сим-карталарды сату тәртібін реттеуді және оларды таратқаны үшін мобильді операторлардың жауапкершілігін арттыруды тапсырды.