$ 469.52 € 553.75 ₽ 6.15

Президент халықты Мемлекеттік рәміздер күнімен құтттықтап, ту көтеру рәсіміне қатысты

Редакция
04 маусым 2024, 04:13
Президент халықты Мемлекеттік рәміздер күнімен құтттықтап, ту көтеру рәсіміне қатысты Сурет авторы: Ақорда

Президент Астана қаласындағы «Атамекен» этно-мемориал кешенінде өткен Мемлекеттік ту көтеру рәсіміне қатысты. Құрмет қарауылы ротасының бастығы салтанатты шараға дайындығы жөнінде Мемлекет басшысына рапорт берді. Содан кейін еліміздің әнұраны шырқалып, көк байрағымыз көтерілді. 

Қасым-Жомарт Тоқаев жиналған жұртшылықты Мемлекеттік рәміздер күнімен құттықтап, бұл елдігімізді нығайта түсетін мерейлі мереке екеніне назар аударды.

– Осы мерекеге орай біз жаңа ғана еліміздің бас байрағын көтердік. Көк туымыз әрдайым биікте желбірей берсін! Туымызды тік ұстау – әр азаматтың перзенттік парызы. Аспан түстес көк байрағымыз – біздің мақтанышымыз. Спортшыларымыз туымызды талай рет жеңіс тұғырына көтерді. Жақында қазақтың қайсар қыздары Эверестке шықты. Туымыз әлемнің ең биік шыңында тағы да желбіреді. Алда Олимпиада ойындары келе жатыр. Намысты өрендеріміз Париж төрінде туымызды тік ұстайды деп сенемін, – деді Президент.

Мемлекет басшысы байрағымыз аспандаған сайын ұлт мерейі асқақ болатынын айтып, туды тәуелсіздігіміздің тұмары әрі ынтымағымыздың бастауы деп атады.

– Батыр бабаларымыз ел тағдыры сынға түскен сәтте бір тудың түбінен табылған. Бірлігін бекем ұстаған, елі мен жерін қорғаған. Байтақ даланы көзінің қарашығындай сақтап, ұрпағына мирас еткен. Сол аманатқа адал болу – ұрпақтың ұлы мұраты, – деді Қасым-Жомарт Тоқаев.
Ту көтеру рәсіміне Парламент Сенатының Төрағасы Мәулен Әшімбаев, Парламент Мәжілісінің Төрағасы Ерлан Қошанов, ҚР Мемлекеттік кеңесшісі Ерлан Қарин, Президент Әкімшілігінің Басшысы Айбек Дәдебай, сондай-ақ мемлекеттік органдардың басшылары, Үкімет мүшелері, Парламент депутаттары, жоғары әскери оқу орындарының курсанттары мен олардың туыстары қатысты.
 
Салтанатты рәсімде жоғары әскери оқу орындарының 12 үздік түлегі Қазақстан Президенті – Қазақстан Республикасы Қарулы Күштерінің Жоғарғы Бас қолбасшысының қолынан офицерлік шен алды. 

ҚР ҚМ С.Нұрмағамбетов атындағы Құрлық әскерлер әскери институты:
 1. Асылбеков Иманжүсіп Асылбекұлы;
2. Алпысбаев Бауыржан Ақылжанұлы; 
ҚР ҚМ Радиоэлектроника және байланыс әскери-инженерлік институты:
 3. Дайырбай Бекжан Мұратұлы;
4. Омаров Диас Бейсенгелдіұлы; 
ҚР ҰҚК Шекара қызметі академиясы:
 5. Төтен Ернұр Жанатұлы; 
ҚР ҰҚК Академиясы:
 6. Жұмабек Нұрахмет Шаяхметұлы; 
ҚР ІІМ Б.Бейсенов атындағы Қарағанды академиясы:
 7. Жанатбай Санжар Жандарұлы;
8. Сорокина Александра Максимовна; 
ҚР Ұлттық ұлан академиясы:
 9. Ағыбаев Тимур Бауыржанұлы;
10. Жеңіс Жалғас Төлегенұлы; 
ҚР ТЖМ М.Ғабдуллин атындағы Азаматтық қорғау академиясы:
 11. Жігербаев Ернар Азаматұлы;
12. Еркенов Диас Серікұлы.

Соңғы жаңалықтар