Президент ахалтеке тұқымды сәйгүліктерге қандай есім берді

Мемлекет басшысы Қасым-Жомарт Тоқаев Президент істері басқармасына қарасты ат қорадағы ахалтеке тұқымды жылқылардың күй-жайын көріп, олардың ұсталу шарттарымен танысты, деп хабарлайды kazinform.kz.

Аталған ат қорада әр жылдары Мемлекет басшысына сыйға тартылған асыл тұқымды жылқылар бапталады. Жақында екі биеден төл алынып, жылқы табыны толықты. Қасым-Жомарт Тоқаев жаңа туған құлындарға «Акниет» және «Борте» деп есім берді.

Мемлекет басшысы жылқылардың жағдайын бақылай отырып, қазақтың «Ер жетіліп, бас болар, тай жетіліп, ат болар» деген халық даналығын тілге тиек етті. Сонымен қатар Президент құлындардың сау әрі жүйрік болып өсуіне тілектестік білдірді.

Айта кетейік, Мемлекет басшысы мамыр айының басында да ат қораға арнайы барып, асыл тұқымды сәйгүліктердің күтімі мен оларды ұстау жағдайын жеке бақылауына алған болатын. Ахалтеке жылқылары – әлемдегі ең көне әрі ерекше сұлулыққа ие тұқымдардың бірі, сондықтан оларды баптап, сақтап қалу маңызды мәдени және тарихи міндеттердің бірі саналады.