Пойыз қозғалысын жеделдету жолдары талқыланып жатыр

Ұзақ қашықтыққа қатынайтын пойыздардың жүру уақыты қысқаруы мүмкін.

«ҚТЖ» төрағасының орынбасары Әнуар Ахметжановтың айтуынша, Астанадан Омбыға қатынайтын пойыз 20-дан астам станцияда тоқтайды. Басшылық кейбір шағын станцияларда пойыздардың тоқтауын түбегейлі алып тастауды көздейді. Нәтижесінде халықаралық бағыттардағы қозғалыс жылдамдауы мүмкін.

Бұдан бөлек, жаз мезгілінде болатын жөндеу жұмыстары пойыздардың жүру уақытына әсер етеді, дейді.

Ахметжановтың айтуынша, Talgo вагондарының жылдамдығы стандартты құрамдармен салыстырғанда 20–25 пайызға жоғары. Сондай-ақ Stadler пойыздары да жоғары жылдамдықпен ерекшеленеді.

Бұған дейін де көлік министрі Нұрлан Сауранбаев жаңа теміржол желілері салынатын өңірлер туралы мәлімдеген болатын.