Полиция: арнайы жасақ қызметкерінің өлімі қызметтік міндетімен байланысты емес

Жамбыл облыстық полиция департаменті арнайы мақсаттағы жедел қимыл жасағы (СОБР) қызметкерінің өліміне қатысты алдын ала мәлімет жариялады. Ведомствоның хабарлауынша, оқиға әзірге қызметтік міндеттерді атқарумен байланысты емес деп бағаланып отыр.

Полиция мәліметінше, аталған дерек бойынша Қылмыстық кодекстің 105-бабы – “Өзін-өзі өлтіруге дейін жеткізу” бойынша сотқа дейінгі тергеу басталған. Қазір істің барлық мән-жайын жан-жақты және объективті анықтауға бағытталған тергеу әрекеттері жүргізіліп жатыр.

Сонымен қатар қызметтік тексеріс тағайындалған. Полиция департаменті тергеу мүддесіне байланысты өзге ақпарат жарияланбайтынын мәлімдеді.

Бұған дейін Жамбыл облысының Қордай ауданындағы полиция бөлімінің ғимаратында СОБР қызметкері табельдік қарудан жараланып, кейін ауруханада көз жұмғаны хабарланған болатын.